Gruhalakshmi ಗೃಹಲಕ್ಷ್ಮಿ ಯೋಜನೆ
ರಾಜ್ಯದ ಕಾಂಗ್ರೆಸ್ ಸರ್ಕಾರ ತನ್ನ ಐದು ಮಹತ್ವದ ಗ್ಯಾರಂಟಿ ಯೋಜನೆಗಳನ್ನು ಕ್ರಮಕ್ರಮವಾಗಿ ಜಾರಿಗೆ ತರುತ್ತಿದೆ. ಈ ಪೈಕಿ ಗೃಹಲಕ್ಷ್ಮಿ ಯೋಜನೆ ಹೆಗ್ಗುರುತಾಗಿದ್ದು, ಅದರ ಮೂಲಕ ರಾಜ್ಯದ ಹಲವಾರು ಗೃಹಿಣಿಯರಿಗೆ ಪ್ರತಿ ತಿಂಗಳು ರೂ. 2000 ಹಣ ನೇರವಾಗಿ ಖಾತೆಗೆ ಜಮೆಯಾಗುತ್ತಿದೆ.
ಬಡತನ ರೇಖೆಗಿಂತ ಕೆಳಗಿರುವ ಕುಟುಂಬಗಳ ಯಜಮಾನಿಯರಿಗೆ ಈ ಯೋಜನೆಯ ಮೂಲಕ ನಿಗದಿತ ಹಣ ಸಹಾಯವಾಗಿ ಲಭ್ಯವಾಗುತ್ತಿದ್ದು, ಜನಸಾಮಾನ್ಯರಿಗೆ ಇದು ದೊಡ್ಡ ಆರ್ಥಿಕ ಬಲವಾಗಿ ಪರಿಣಮಿಸಿದೆ. ಆದರೆ ಇತ್ತೀಚೆಗೆ, ಈ ಯೋಜನೆಯ ಹಣ ಪಾವತಿಯಲ್ಲಿ ತಾತ್ಕಾಲಿಕ ತಡೆ ಉಂಟಾಗಿದೆ ಎಂಬ ವರದಿಗಳು ಮೂಡಿಬಂದಿವೆ.
ತಾಂತ್ರಿಕ ತೊಂದರೆಗಳ ಹಿನ್ನೆಲೆಯಲ್ಲಿ ಜನವರಿಗೆ ನೀಡಬೇಕಾದ 16ನೇ ಕಂತು ಹಣವನ್ನು ಸರ್ಕಾರ ವಿಳಂಬವಾಗಿ ಜಮಾ ಮಾಡಿದ್ದು, ಕೆಲ ಮಹಿಳೆಯರ ಖಾತೆಗಳಿಗೆ ಹಣ ಸರಿಯಾಗಿ ಹರಿದಿಲ್ಲ. ಇದರ ಪರಿಣಾಮವಾಗಿ ವಿಪಕ್ಷಗಳು ಸರ್ಕಾರದ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿವೆ. “ಮಾತು ಕೊಟ್ಟಿದ್ದೀರಿ, ಹಣ ಕೊಡಿ!” ಎಂಬ ಒತ್ತಡ ಬಿಜೆಪಿಯಿಂದ ಜೋರಾಗಿದೆ.
ಇದೀಗ, ಬಾಕಿ ಉಳಿದ ಕಂತುಗಳ ಪಾವತಿ ಪ್ರಕ್ರಿಯೆ ಆರಂಭವಾಗಿದೆ. ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಸಚಿವ ಲಕ್ಷ್ಮೀ ಹೆಬ್ಬಾಳ್ಕರ್ ಅವರು ನೀಡಿದ ಮಾಹಿತಿಯ ಪ್ರಕಾರ, ಜನವರಿ ತಿಂಗಳ ಹಣ ಈಗ ಖಾತೆಗಳಿಗೆ ಜಮೆಯಾಗಿದ್ದು, ಫೆಬ್ರವರಿಯ ಕಂತು ಇದೇ ಏಪ್ರಿಲ್ 15ರೊಳಗೆ ಲಭಿಸಲಿದೆ.
ಕಳೆದ ಬಜೆಟ್‌ನಲ್ಲಿ ಮಹಿಳೆಯರ ಆರ್ಥಿಕ ಬಲವರ್ಧನೆಗೆ ‘ಅಕ್ಕ ಸೊಸೈಟಿ’ ಘೋಷಣೆ ಮಾಡಿದ ಮುಖ್ಯಮಂತ್ರಿ ಸಿದ್ದರಾಮಯ್ಯ ನೇತೃತ್ವದ ಸರ್ಕಾರ, ಗೃಹಲಕ್ಷ್ಮಿ ಯೋಜನೆಗೆ ಪ್ರಮುಖ ಬದಲಾವಣೆಗಳನ್ನು ತರಲು ತಯಾರಿ ನಡೆಸುತ್ತಿದೆ.
ಇದೇ ವೇಳೆ, ಮಾರ್ಚ್ ತಿಂಗಳ ಪಾವತಿ ತಾತ್ಕಾಲಿಕವಾಗಿ ಸ್ಥಗಿತವಾಗುವ ಸಾಧ್ಯತೆ ಇದೆ. ರಾಜ್ಯ ಸರ್ಕಾರದ ಆದಾಯ ಹಾಗೂ ವಾಣಿಜ್ಯ ತೆರಿಗೆ ಇಲಾಖೆಗಳು, ಫಲಾನುಭವಿಗಳ ಐಟಿ ಮತ್ತು ಜಿಎಸ್‌ಟಿ ವಿವರಗಳ ಪರಿಶೀಲನೆ ನಡೆಸುತ್ತಿರುವ ಹಿನ್ನೆಲೆಯಲ್ಲಿ ಈ ತೀರ್ಮಾನ ಕೈಗೊಳ್ಳಲಾಗಿದೆ. ಆಯಾ ಇಲಾಖೆಗಳ ದೃಢೀಕರಣ ಬಂದ ಬಳಿಕ ಮಾತ್ರ ಧನಸಹಾಯ ನೀಡುವ ಬಗ್ಗೆ ಅಂತಿಮ ನಿರ್ಧಾರ ಕೈಗೊಳ್ಳಲಾಗುತ್ತದೆ.
ಇದರಿಂದಾಗಿ, ಟ್ಯಾಕ್ಸ್ ಪೇಯರ್ ಎನಿಸಿಕೊಂಡಿರುವ ಅಥವಾ ದಾಖಲೆಗಳ ಪರಿಶೀಲನೆ ಪ್ರಕ್ರಿಯೆ ನಡೆಯುತ್ತಿರುವ ಫಲಾನುಭವಿಗಳಿಗೆ ಹಣ ತಡವಾಗುವ ಸಾಧ್ಯತೆಯಿದೆ. ಈ ಸ್ಥಿತಿಯಲ್ಲಿ, ಮಾರ್ಚ್ ತಿಂಗಳ ಸಹಾಯಧನ ಪಾವತಿ ವಿಳಂಬವಾಗಬಹುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
